വ്യവസായവകുപ്പ് ആരംഭിച്ച ചാറ്റ് വിത്ത് മിനിസ്റ്റര്‍ സംവിധാനം വഴി കഴിഞ്ഞ മൂന്ന് മാസത്തിനിടെ സംരംഭകരില്‍ നിന്ന് ലഭിച്ച 601 പരാതികളില്‍ 553 എണ്ണവും പരിഹരിച്ചതായി മന്ത്രി പി. രാജീവ്.
ഇതില്‍ 90 ശതമാനത്തിലധികം പരാതികളും ലഭിച്ച് 7 ദിവസത്തിനുള്ളില്‍ പരിഹരിക്കപ്പെട്ടു.
2022 ഡിസംബര്‍ 22ന് വ്യവസായവകുപ്പ് ആരംഭിച്ച ചാറ്റ് വിത്ത് മിനിസ്റ്റര്‍ സംവിധാനം കേരളത്തിലെ സംരംഭകരുടെ പരാതികള്‍ പരിഹരിക്കുക എന്ന ലക്ഷ്യത്തോടെയുള്ളതായിരുന്നു. ആരംഭിച്ച് മൂന്ന് മാസത്തെ കണക്കുകള്‍ പരിശോധിക്കുമ്പോള്‍ 92% പരാതികളും പരിഹരിക്കാന്‍ സാധിച്ചു. വ്യവസായ സംരംഭകര്‍ അവരുടെ സംരംഭങ്ങളുമായി ബന്ധപ്പെട്ട സംശയങ്ങളും പരാതികളും 9846441445 എന്ന വാട്‌സാപ്പ് കോണ്ടാക്റ്റ് നമ്പറിലേയ്ക്ക് സന്ദേശമായി അയച്ചാല്‍ മാത്രം മതി. ഇതിന്മേല്‍ ജില്ലാതല റിസോഴ്‌സസ് പേഴ്‌സണ്‍മാരും വ്യവസായ വകുപ്പിലെ ഉദ്യോഗസ്ഥരും അടങ്ങുന്ന സംവിധാനത്തിലൂടെ പരിഹാര നടപടികള്‍ സ്വീകരിക്കും. പരാതി പരിഹരിച്ച് സംരംഭകര്‍ക്ക് മറുപടി നല്‍കുന്നന് പരമാവധി 7 ദിവസത്തെ സമയ പരിധി ആണ് നിശ്ചയിച്ചിരിക്കുന്നത്. ഒരു വര്‍ഷം കൊണ്ട് 7 ദിവസമെന്ന സമയപരിധി 48 മണിക്കൂര്‍ ആക്കി ചുരുക്കും. എല്ലാ പ്രവര്‍ത്തി ദിനങ്ങളിലും രാവിലെ 10 മണി മുതല്‍ വൈകുന്നേരം 5 മണി വരെ ഈ നമ്പറിലേയ്ക്ക് സന്ദേശം അയക്കാം. സംരംഭകര്‍ക്ക് തടസങ്ങളില്ലാതെ പ്രവര്‍ത്തനം മുന്നോട്ട് കൊണ്ടു പോകാന്‍ ചാറ്റ് വിത്ത് ദി മിനിസ്റ്റര്‍ ഏറെ സഹായകമാകും.