പ്രീമിയം കഫേകൾ ആരംഭിക്കാൻ കുടുംബശ്രീ. ഇതിനായി കുടുംബശ്രീ അംഗങ്ങൾ, ഓക്‌സിലറി ഗ്രൂപ്പ് അംഗങ്ങൾ എന്നിവരിൽ നിന്ന് വിവിധ ജില്ലകളിലേക്കായി താത്പര്യപത്രം ക്ഷണിച്ചു. 50 മുതൽ 100 പേർക്ക് ഇരിക്കാവുന്ന എ.സി സൗകര്യമുള്ള പ്രീമിയം കഫേകളാണ് കുടുംബശ്രീ ഒരുക്കുന്നത്. പാർക്കിംഗ് സൗകര്യം, മെച്ചപ്പെട്ട ശുചിമുറികൾ, ആധുനിക ഫർണിച്ചർ, നാപ്‌കിൻ മെഷീനുകൾ, നാപ്‌കിൻ നശിപ്പിക്കുന്ന യന്ത്രങ്ങൾ തുടങ്ങി സ്ത്രീ സൗഹൃദാന്തരീക്ഷം കഫേകളിൽ ഉണ്ടായിരിക്കും.
40 മുതൽ 50 ലക്ഷം രൂപ മുതൽ മുടക്കിൽ ഈ സംരംഭം ആരംഭിക്കാം. 20 ലക്ഷം രൂപ വരെ കുടുംബശ്രീ ധനസഹായം ലഭിക്കും. വൈവിധ്യമായ ഭക്ഷണം പ്രീമിയം കഫേകളിൽ ലഭ്യമാക്കുമെന്നും കുടുംബശ്രീ അധികൃതർ അറിയിച്ചു.
ഓഗസ്റ്റിൽ ഗുരുവായൂർ സ്വകാര്യ ബസ് സ്റ്റാൻഡിൽ ജനകീയ ഹോട്ടൽ നവീകരിച്ച് പരീക്ഷണ അടിസ്ഥാനത്തിൽ ആദ്യത്തെ പ്രീമിയം കഫേ പ്രവർത്തനം ആരംഭിച്ചിരുന്നു. ഹോട്ടൽ മാനേജ്മെന്റിൽ പരിശീലനം ലഭിച്ച കുടംബശ്രീ അംഗങ്ങൾക്കാണ് പ്രീമിയം ഹോട്ടൽ നടത്തിപ്പിന്റെ ചുമതല. താത്പര്യപത്രം സമർപ്പിക്കേണ്ടതിന്റെ വിശദവിവരങ്ങൾ ജില്ലാ മിഷൻ പ്രസിദ്ധീകരിച്ചിട്ടുണ്ട്.
