ജീവകാരുണ്യ പ്രവര്‍ത്തനങ്ങളില്‍ മുന്‍നിരയില്‍ നില്‍ക്കുന്നവരുടെ ഫോബ്സ് ഏഷ്യാസ് ഹീറോസ് ഓഫ് ഫിലാന്ത്രോപ്പി പട്ടികയിൽ അദാനിയും.
അദാനി ഗ്രൂപ്പ് ചെയര്‍മാന്‍ ഗൗതം അദാനി ഉള്‍പ്പെടെ മൂന്ന് ഇന്ത്യക്കാരാണ് പട്ടികയില്‍ ഇടംപിടിച്ചത്.
ലോകത്തിലെ മൂന്നാമത്തെ ധനികനായ അദാനി, അദാനി ഫൗണ്ടേഷനിലൂടെ ജീവകാരുണ്യ പ്രവര്‍ത്തനങ്ങളില്‍ സജീവമാണ്.
ഈ വര്‍ഷം ജൂണില്‍ അദാനിയുടെ 60-ാം ജന്‍മദിനാഘോഷത്തിന്‍റെ ഭാഗമായി ജീവകാരുണ്യ പ്രവര്‍ത്തനങ്ങള്‍ക്കായി 60,000 കോടി രൂപ പ്രഖ്യാപിച്ചിരുന്നു. ആരോഗ്യം, വിദ്യാഭ്യാസം, നൈപുണ്യവികസനം തുടങ്ങിയ മേഖലകളില്‍ ഈ പണം വിനിയോഗിക്കും.
എച്ച്‌സിഎല്‍ സഹസ്ഥാപകനായ ശിവ് നാടാര്‍, ഹാപ്പിയസ്റ്റ് മൈന്‍ഡ്‌സ് ടെക്‌നോളജീസ് എക്‌സിക്യൂട്ടീവ് ചെയര്‍മാന്‍ അശോക് സൂത എന്നിവരാണ് പട്ടികയിലുള്ള മറ്റ് രണ്ട് ഇന്ത്യക്കാര്‍. ഈ വര്‍ഷം 11,600 കോടി രൂപ (142 മില്യണ്‍ ഡോളര്‍) ജീവകാരുണ്യ പ്രവര്‍ത്തനങ്ങള്‍ക്കായി നാടാര്‍ നീക്കിവച്ചിട്ടുണ്ട്. 1994ല്‍ ശിവ് നാടാര്‍ സ്വന്തം പേരില്‍ സ്ഥാപിച്ച ഫൗണ്ടേഷന്‍ ജീവകാരുണ്യ പ്രവര്‍ത്തനങ്ങള്‍ക്കായി ഇതുവരെ ഏകദേശം 1.1 ബില്യണ്‍ ഡോളര്‍ ചെലവഴിച്ചു.
